Sprachdatei (378 kB)
(Werke Nr. 06) - Aus dem Buch:
A goldene Bruckn
oamlikeiten
a Winter is hiaz wirkli do,olls spielt sih in da Keuschn o',
und tiaf vaschniebn is Steig und Stoa -
hom nur die Kina draußt wos z'toa,
und kugln fleißi um in Schnee.
Da Muatter, moan i, paßt des eh,
mocht ollahond aus Stoff und Wolln,
wos d'Kina noh nit sehgn solln.
Wos follt den nur in Voter ein?
In Werkzeugkammerl is er drein,
hot richti woahr die Tür zuagspirrt,
und d'Muatter roat: "Wos 's eppa wird?
Vielleicht a Schamerl für die Kloa?
Fürn Buam a Schlittn? Na, i moa,
fürs Dirndl wirds a Puppnwiagn.
Am End soll eppa i wos kriagn?
A neuche Nahschatulln wa schön..."
A wengerl muaß sie losn gehn.
Ma hört 'n hobln, sagln, schleifa
und untadrein a Liadl pfeifa.
Hiaz brummt er, fuxt'n wos? - Jo, Bua,
hiaz rutscht eahm goar a Fluach dazua!
Des wa' koa Ghörtsih, kimmt da vür -
jo mei, da Teifl schloft holt nia.
Sprachdatei (537 kB)
chifferlsetzn
an Schifferlsetzn, wer's nit
woaß,
do braucht ma Schneid, des is koa Gspoaß!
Es is nit ganz geheuer draußt,
die Finstern bruat, da Schneewind pfaust,
da Weg vawaht, die Kältn krocht,
und noh dazua - in dera Nocht!
Gwiß geht hiaz wo da Klaubauf um
mit Buttn, Kettn, Ruatntrumm...
Hiaz oba nutzt koa Roatn nit,
durch Schnee und Finstern, Tritt für Tritt
mi'n Schifferl untern Janker drein,
es derf nit noß und zomdruckt sein.
Is 's Pfeifa sunst gegns Fürchtn guat,
bist gwiß, daß des heint koana tuat;
de Angst is ondascht, und dagegn
wirds Betn mehra richtn mögn.
Weit is da Weg zan Nochban heint!
Wia endli doh a Liachtl scheint,
a neuche Gfoahr! Ma is nit gwiß,
ob nit noh wer heraußtn is.
Gonz hoamli soll jo 's Schiff einfoahrn,
wann dih wer siacht, is olls valorn.
Ma duckt sih, schleicht auf jedn Foll -
grod trogg die Moahm a Strah in Stoll,
va dera kunnt ma sicher sein.
Und wusch, is ma in Vorhaus drein,
hängt's Schifferl auf die Türschnolln hin!
Wias Herz laut pumpert - hörn sie's drin?
Nur aus und hoam, so schnell ma konn,
bold grennt, bold kuglt, nur davon!
Dahoam richt d'Muatter 's Nochtmohl grod
und frogt, ob oan wer gsehgn hot?
Hiaz tuat ma groß, ma konns riskiern:
"Na, mir konn sowos nit passiern!
Und morgn, wann i mei Schifferl hol,
aft is's mit Nuß und Lebzölt voll!"